Batman vs Superman حرب متتوصفش

2016-03-21

الأمر فعلاً عجيب ومحتاج تفكير كتير! ازاي اثنين من أعظم الأبطال المنقذين للبشرية هنشوفهم السنة دي في أشتباكات غير عادية وحرب متتوصفش في السينما.

من الإعلانات اللى نزلت ظهر سوبرمان في حرب مدمرة حرب مات فيها كتير من البشر اللى منهم كان شايف ان سوبرمان آله. ومنهم اللى رأيه من رأي باتمان ان سوبرمان بيشكل تهديد على مستقبل البشرية بسبب قوته الخارقة، وده اللى هيخلي باتمان يصر على مواجهته .. بس ياتري المواجهه بينهم هتكون أزاي؟
مشهد لازم تاخد بالك منه خصوصاً لو أنت بتحب الشخصيات دي تصدي باتمان للكمة خارقة من سوبرمان من غير ما يبذل أي مجهود، لدرجة ان سوبرمان اندهش إن إنسان عادي لا يمتلك قوة خارقة تصدي للكمته بسهولة وهنا السؤال، مين الأقوى باتمان الأنسان العادي وللا سوبرمان الرجل الخارق؟
الأعلان وضح أن الحرب مش بس بين باتمان وسوبرمان لأن ظهور وندر ومين في الأعلان جنب الأبطال دليل على أن ممكن يحصل تعاون بينهم لمواجهة الخطر الحقيقى وحماية البشرية! بس أيه هو الخطر ومين اللى بيهدد البشرية؟
مفاجأة غير متوقعه وهي ظهور جثة كينج زود ودي كانت الشخصية الشريرة اللي ظهرت في آخر فيلم لـ سوبرمان سنة 2013 فيلم مان أوف ستيل رغم إن سوبرمان قضى عليه في نهاية أحداث الفيلم .. آيه سر ظهور كينج زود مرة تانية وآيه تأثيره على الأحداث؟
المخرج مكفهوش كل الأحداث دي وحب يشوقنا أكتر للفيلم بلقطة في الاعلان بذلة روبن مساعد باتمان الشهير، ومكتوب عليها رسالة تهديد بتوقيع عدو باتمان اللدود – الجوكر – .. هل الجوكر هيظهر في الفيلم؟